Gue setel deh lagu bang Nyamin, "Jakarta Kebanjiran heh heh...". Alhamdulillah rume gue kagak kena banjir tapi gue jadi kagak bisa kemane-mane. Lha orang semua jalur di Jakarta banjir. Di jalan-jalan utama, jalur ijo, jalur tol, semuenye kelelep.

Orang-orang nyang doyan ngomong pade protes same pemerentah Betawi. Bang Yos dibilang gak becus ngatur tate kote Betawi. Padahal, kalo kate gue sih, sebenere Bang Yos ude berusahe bikin Kanal buat antisipasi banjir. Cuman aje die suse banget ngebebasin tanah warge kite buat proyeknye entuh.

Emang sih kagak bisa disalahin juga. Sebage warge Betawi, gue sih siap aje kalo rume gue mo dibebasin buat proyek banjir kanal. Abis daripade banjir melulu, kan kite semue pade repot. Warge nyang kagak mao tanahe dibebasin sebenere bukan lantaran kagak mao. Tapi biasenye nih, kembali ke masalah obyekan. Maksud gue, doku yang diterima warge biasenye ude kena potong sini potong situ. Lu tau dah, itu kebiasaan birokrat dan calo tane di Betawi enih. Die-die pade cari obyekan buat nambahin kantonge ndiri.

Kalo aje kagak ada nyang namenye tukang ngobyek, kalo bahase kerennye sih, koruptor, bisa jadi warge mah kagak keberatan rumenye digusur. Jadi kalo masalahnye kesiapan warge, sebenere kite siap aje ngedukung program Bang Yos atau siape kek nyang bakalan jadi Dedengkot kote Betawi enih.

Ngomongin soal Gubernur baru, kalo kate gue sih, siape aje boleh jadi dedengkot asal niat dan usahenye bener-bener buat nyenengin warge. Bukannye buat cari keuntungan ndiri. Emang sih, nyalonin diri jadi gubernur entu modale gede. Tapi kalo bisa sih, jangan jadiin jabatan buat kepentingan puser same partai. Trus terang aje ye, gue enek banget kalo ngeliat orang-orang partai. Bener kate MT, orang-orang partai entu cuma mikirin pegimane die bisa dapet kekuasaan lantas ngumpulin doku sebanyak-banyake buat partainye kendiri. Ini namenye politisi bangsat! Duh, ude deh, kalo ngomongin orang partai, gue bawaaannye mo ngedumel aje.

Pokoknye gini aje deh. Pesen gue buat pare calon gubernur, kalo emang elu pade cuman mao nyari enake doangan, mending lu gantung diri aje deh. Dari pade nti digantung ame warge Betawi, nyaho luh!

Akhire, gue cuman bisa ngedoain aje, moga-moga aje eni musibah bikin kite tambe nyadarin diri. Bikin kite pade kapok ame nyang namenye banjir. Ngomong-ngomong ni ye... musim banjir keknye kaga ade orang nyang mao nyukur nih. Dari kemaren gue kagak dapet duit lantaran kaga ade nyang mao nyukur rambute same gue.