Gue dateng nengokin ponakan nyang lagi nyantri. Pesantrennye jauh banget, di tengah gunung di daerah Banten sono. Kayaknye enak juga sih, dari atas gunung entu, kite bisa ngeliat pantai anyer. Tapi keponakan gue kagak betah sekolah di situ. Kenape?

Gue coba tanya, pas die udah kagak ngambek lantaran gue bawain coklat silperkwin kedoyanan die. "Kenape lu kagak betah di sini?" tanya gue. Die nyeritain kalo sekolah di sini banyak aturan. Boro-boro mikirin pelajaran. Tiap ari, yang die pikirin cuman gimana nggak kena hukuman gara-gara -sengaja atawe kagak- ngelanggar aturan.

Wah, gue tanya, "Ape aje peraturannye?" Salah satunye, kagak boleh ngomong pake bahasa ELJI. Gue bingung, apaan tuh bahase ELJI? Ponakan gue kasih tau, ELJI itu singkatan dari hurup L sama G, lantaran dibacanye biar keren, pake keinggris-inggrisan gitu deh. Hehehe... baru ngatri dah gue. L-G itu artinye kagak boleh ngomong pake istilah Lu - Gue...

Lha? Gue bilang sama salah seorang guru nyang kebetulan liwat. Kenape bahasa LG kagak boleh? Lha berape kali gue ke pesantren enih, ada juga orang nyang ngomongnya pake bahasa Sunda, pake aing-aingan.... ade juga nyang pake bahasa jawa, kayak bojone gitu... Lha tapi kenape nyang kagak boleh cuman bahasa Betawi doangan?

Terus terang gue tersinggung. Gue ini orang betawi asli, bukan bajakan! Gue ngerasa, kalo di otak orang-orang nyang ngurusin entuh sekolahan, bahasa Betawi kesannye kagak sopan, atawe rendah martabatnye kali ye?!! Bahasa Betawi dianggap bahasa orang yang kagak pernah makan apusan sekolahan... kampungan....! Ini penghinaan banget!

Te! Pegimane nih?

Labels: Betawi Kampungan

Astagafirulloh, kemaren suse banget nyari bengsin. Ude nyatronin 3 POM Bengsin, eh taunye kagak ada Premium. Kalo Pertamax sih, ade, tapi hargenye entuh nyang bikin kantong gue kedodoran. Masa motor warisan gue CB100... (Jangan ketawa lu Te!) musti dikasih Pertamax! Lha ntar tuh motor bukannye ngebut, malah mencret! Biase dicekokin bengsin, mane bisa dikasih nyang mahalan.

Bini gue aje begitu. Waktu bini gue ulang taon, gue iseng-iseng ngasih hadiah. Lu tau kan Te, Mpo Geboy ntu kan paling doyan same gegaresan kampung kayak combro, misro. Paling banter, die demen banget same Ruti Abuk. Nah, waktu entu, gue beliin die burger di Mekdi. Eh, belon juga tu burger abis dimakan, bini gue langsung moncor! Mencret! Lu taukan, berape harge burger. Abongan kalo dibandingin same combro.

Kerna entu, gue mending kagak pake Pertamax dah. Lagian, lu tau deh, nyang ngantri Pertamax aje ampe bejubel. Kaye uler Phyton lagi mao betelor.

Nah, pas gue ude putus arepan, eh gue liat di sebrang POM Bengsin ada nyang jualan bengsin eceran. Langsung aje gue selodor jalan buat ngisi bengsin di eceran ntuh. Atapiloh! Hargenye gila banget, Te! Masa die jual bengsin 6 rebu!! Lha Pertamax aje 6500. Nyang gue sebel, itu emak-emak nyang jualan bengsin cuek aje lagi pas tau gue ngerasa harge nyang die tawarin kemahalan. Die cuman mandangin antrian motor ame mubil di POM Bengsin. Lha gue clingak-clinguk antara POM dan Eceran... Et dah, Nasip! Akhire gue beli nyang Eceran juga! Dasar Pertamina BELIS!!!

Gue setel deh lagu bang Nyamin, "Jakarta Kebanjiran heh heh...". Alhamdulillah rume gue kagak kena banjir tapi gue jadi kagak bisa kemane-mane. Lha orang semua jalur di Jakarta banjir. Di jalan-jalan utama, jalur ijo, jalur tol, semuenye kelelep.

Orang-orang nyang doyan ngomong pade protes same pemerentah Betawi. Bang Yos dibilang gak becus ngatur tate kote Betawi. Padahal, kalo kate gue sih, sebenere Bang Yos ude berusahe bikin Kanal buat antisipasi banjir. Cuman aje die suse banget ngebebasin tanah warge kite buat proyeknye entuh.

Emang sih kagak bisa disalahin juga. Sebage warge Betawi, gue sih siap aje kalo rume gue mo dibebasin buat proyek banjir kanal. Abis daripade banjir melulu, kan kite semue pade repot. Warge nyang kagak mao tanahe dibebasin sebenere bukan lantaran kagak mao. Tapi biasenye nih, kembali ke masalah obyekan. Maksud gue, doku yang diterima warge biasenye ude kena potong sini potong situ. Lu tau dah, itu kebiasaan birokrat dan calo tane di Betawi enih. Die-die pade cari obyekan buat nambahin kantonge ndiri.

Kalo aje kagak ada nyang namenye tukang ngobyek, kalo bahase kerennye sih, koruptor, bisa jadi warge mah kagak keberatan rumenye digusur. Jadi kalo masalahnye kesiapan warge, sebenere kite siap aje ngedukung program Bang Yos atau siape kek nyang bakalan jadi Dedengkot kote Betawi enih.

Ngomongin soal Gubernur baru, kalo kate gue sih, siape aje boleh jadi dedengkot asal niat dan usahenye bener-bener buat nyenengin warge. Bukannye buat cari keuntungan ndiri. Emang sih, nyalonin diri jadi gubernur entu modale gede. Tapi kalo bisa sih, jangan jadiin jabatan buat kepentingan puser same partai. Trus terang aje ye, gue enek banget kalo ngeliat orang-orang partai. Bener kate MT, orang-orang partai entu cuma mikirin pegimane die bisa dapet kekuasaan lantas ngumpulin doku sebanyak-banyake buat partainye kendiri. Ini namenye politisi bangsat! Duh, ude deh, kalo ngomongin orang partai, gue bawaaannye mo ngedumel aje.

Pokoknye gini aje deh. Pesen gue buat pare calon gubernur, kalo emang elu pade cuman mao nyari enake doangan, mending lu gantung diri aje deh. Dari pade nti digantung ame warge Betawi, nyaho luh!

Akhire, gue cuman bisa ngedoain aje, moga-moga aje eni musibah bikin kite tambe nyadarin diri. Bikin kite pade kapok ame nyang namenye banjir. Ngomong-ngomong ni ye... musim banjir keknye kaga ade orang nyang mao nyukur nih. Dari kemaren gue kagak dapet duit lantaran kaga ade nyang mao nyukur rambute same gue.

Gue heran banget waktu ke pasar kemaren. Sejek bujeg, baru kali enih gue diperatiin orang. Siang entu gue ke pasar buat beli pisang kepok. Bini gue demen banget ame tuh pisang. Dikolak enak, digoreng apelagi! Tapi nyang bikin gue kesel becampur malu, orang-orang pade ngeliatin gue aje... nape ye?

Ape mungkin gue udah jadi beken gare-gare si MT sering ngomongin gue di blognye? Ah, mane mungkin orang kecil macem gue bisa beken. Apelagi cuman gare-gare sering diomongin MT, lah si MTnye aje gak beken, keblangsak! Gue bilang ame bang Kuro, tukang pisang, "Nape sih pade ngiatin gue kaye gitu?!" Si Kuro cuma mesem aje. "Eh, lu ngape? Jangan betingkah de!" Si Kuro yang udeh 2 minggu jadi langganan gue, akire mao ngomong juga.

Cuman aje, abis si Kuro ngomong, gue jadi tambah malu, tambah sale tingke! Lu tau kagak Te! Rupenye, orang-orang pade ngiatin gue lantaran gue belon sudah waktu nyukur kumis. Sial dangkalan, ini gare-gare bini gue yang kagak sabaran! Waktu gue abis mandi, gue mao nyukur kumis, eh, die udah nyerocos, "Kalo kesorean ntar ude diembat orang tuh pisang!" Ya ude, gue langsung pegi. Gue lupa banget kalo belon selese nyukur. Baru kumis sebelah kanan gue aje. nyang kiri rupenya masih gondrong!

Pantes aje orang-orang sepasar pade ngiatin gue. Gue kire gue orang beken! Gak taunye .... ah dasar gue ude tue.

Eh Te, kapan lu mampir ke Jantung Kote Betawi? Lebaran kalo nggak dateng, gue santet pake petasan kendi lu ye!

brati gue bukan orang miskin ye... bener juga kate MT, gue kaga miskin, gue cuman orang suse doangan! Sial lu nte!

Eh, tanggal 1 kemaren bukannye kite ngerayain kesaktian pancasila, malah naekin BBM. Wajar aje kalo bom mledug lagi di Bali. Lagian pemerentah kaga kapok2nye mancing kesel teroris. Ude tau teroris entuh bute mate sama bute atinye, eh malah dipancing ampe die mare2.

Pemerentah kite e'on, terorisnye juga blo'on! Nyang nyengir2 tentunya tinggal pare koruptor aje tuh, terutama di PERTAMINA tuh!

Ah... puyeng gue. Mendingan gue berak aje deh!

Labels: bbm, miskin